کراچی میں دھرنوں کے درمیان تعلیمی سرگرمیوں کی بحالی سے متعلق ابہام کو ختم کرتے ہوئے محکمہ تعلیم سندھ نے منگل کو اعلان کیا کہ صوبے بھر میں تعلیمی ادارے (آج) بدھ کو دوبارہ کھلیں گے۔
صوبائی محکمہ تعلیم کے ترجمان نے واضح کیا کہ تعلیمی مراکز موسم سرما کی تعطیلات کے بعد یکم جنوری 2025 (آج) سے تعلیمی سرگرمیاں دوبارہ شروع کر دیں گے۔
سرکاری اور نجی اسکولوں اور کالجوں میں عموماً ہر سال 21 سے 31 دسمبر تک موسم سرما کی تعطیلات ہوتی ہیں۔
یہ بیان کراچی میں پاراچنار کے مسئلے کے خلاف مجلس وحدت مسلمین (MWM) کی جانب سے ایک ہفتے سے جاری دھرنے کے دوران سامنے آیا ہے، جس کے نتیجے میں متعدد سڑکیں مکمل اور جزوی طور پر بند ہیں۔
پولیس نے مظاہرین کو منتشر کرنے کے لیے کریک ڈاؤن شروع کیا اور کچھ سڑکیں خالی کرانے میں کامیابی حاصل کی تاہم شہر میں متعدد مقامات کو معمول کی ٹریفک کے لیے بند رکھا گیا جن میں یونیورسٹی روڈ پر واقع سفاری پارک، کامران چورنگی، لسبیلہ، عباس ٹاؤن اور دیگر شامل ہیں۔
ایم اے جناح روڈ، نمایش چورنگی پر اس وقت حالات کشیدہ ہو گئے جب مظاہرین نے پولیس پر پتھراؤ کیا اور ان کی 6 موٹر سائیکلوں اور نمائش چورنگی پر ایک چیک پوسٹ کو نذر آتش کر دیا، پولیس کو آنسو گیس کے شیل فائر کرنے اور کارکنوں پر لاٹھی چارج کرنا پڑا۔
قانون نافذ کرنے والے اداروں نے متعدد مظاہرین کو گرفتار کر لیا جنہیں تھانے منتقل کر دیا گیا ہے۔
طویل احتجاج نے بندرگاہی شہر میں روزمرہ کی زندگی کو درہم برہم کر دیا کیونکہ لوگ آزادانہ سفر کرنے سے قاصر تھے۔
پاراچنار، کرم میں واقع ہے، افغان سرحد کے قریب ایک قبائلی ضلع ہے جس کی آبادی 600,000 کے قریب ہے۔ یہ طویل عرصے سے تنازعات کا مرکز رہا ہے۔
نومبر میں شروع ہونے والی حالیہ جھڑپوں میں کم از کم 130 افراد ہلاک ہوئے ہیں اور ایک انسانی بحران کو جنم دیا ہے، جس میں ادویات اور آکسیجن کی قلت پاراچنار کو پشاور سے ملانے والی شاہراہ کی بندش سے مزید بڑھ گئی ہے۔
